شنبه, ۴ دلو ۱۳۹۹

در راستای همگرایی منطقه‌ای

132555327_3720759131350268_6982217660459815713_o

عبدالله در دوشنبه: نقش تاجیکستان در آوردن صلح به افغانستان مهم است

۰۱ جدی ۱۳۹۹

عبدالله عبدالله رییس شورای عالی مصالحۀ ملی، بعد از ظهر امروز (دوشنبه، ۱ جدی ۱۳۹۹) با قاهر رسول‌زاده صدراعظم جمهوری تاجیکستان دیدار کرد.

صدراعظم جمهوری تاجیکستان تشریف آوری رییس شورای عالی مصالحه‌ی ملی را خیر مقدم گفت و از تلاش‌های صلح در افغانستان استقبال کرد. آقای رسول‌زاده در ا‌دامه‌ صحبت‌های خود گفت که افغانستان از دوستان و متحدان تاجیکستان می‌باشد و روابط میان دو کشور حسنه است. صدراعظم تاجیکستان همچنان علاوه کرد که کشورش از تلاش‌های صلح در افغانستان حمایت می‌کند و صلح و ثبات در افغانستان را صلح و ثبات در تاجیکستان و منطقه می‌داند.

رسول‌زاده ابراز امیدواری نمود که تلاش‌های صلح به رهبری عبدالله عبدالله نتیجه بدهد و از همکاری کشورش برای تحقق صلح در افغانستان اطمینان داد.

عبدالله عبدالله رییس شورای عالی مصالحه‌ی ملی با تشکر و قدردانی از دعوت جمهوری تاجیکستان و همکاری‌های این کشور با مردم افغانستان و حمایت از تلاش‌های صلح، روابط میان دو کشور را دیرینه و تاریخی خواند و تصویر روشنی از مذاکرات صلح، حمایت منطقه‌ای و بین‌المللی از تلاش‌های صلح، سفرهای منطقه‌ای و وضعیت سیاسی در کشور ارایه کرد.

عبدالله عبدالله رییس شورای عالی مصالحه‌ی ملی، نقش تاجیکستان را با درنظرداشت تجربۀ صلح در این کشور در تأمین صلح در افغانستان مهم خواند و خواهان همکاری این کشور در این زمینه گردید.

امام علی رحمن,تاجیکستان,صلح افغانستان,عبدالله,قاهر رسول زاده