دوشنبه, ۱۵ قوس ۱۴۰۰

در راستای همگرایی منطقه‌ای

62528666_2230790396997190_7585488672296796160_n

نگرانی بی‌سابقۀ کشورهای آسیای مرکزی از پیش روی طالبان در شمال افغانستان

04 July 2021

رؤسای جمهور افغانستان و تاجیکستان دربارۀ اوضاع امنیتی به ویژه حوادث اخیر در شمال افغانستان گفت‌وگو کردند.

ارگ ریاست جمهوری افغانستان می‌گوید که در این مکالمه تیلفونی، هر دو جانب در مورد آن عده شهروندان افغان که در اثر ظلم و خشونت طالبان در مناطق مرزی با تاجیکستان به آن کشور پناه برده اند، صحبت نمودند.

رئیس جمهور تاجیکستان از وضعیت پیش آمده ابراز نگرانی کرد و در مقابل رئیس جمهور غنی ضمن قدردانی از حسن نیت و حس بشردوستانه کشور دوست و همسایه تاجیکستان در برابر شهروندان افغان، گفت که دولت جمهوری اسلامی افغانستان در قبال شهروندان خویش مسئول است و به زودترین فرصت، اقدامات لازم و عاجل را به منظور رسیدگی به آنان انجام خواهد داد.

این صحبت درحالی‌ صورت می‌گیرد که طالبان بخش‌های وسیعی از شمال افغانستان از جمله مناطق مرزی با کشورهای آسیای مرکزی را اشغال کرده‌اند.

کشورهای آسیای مرکزی از پیش‎‌روی طالبان در شمال افغانستان، سخت نگران هستند. وزرای خارجۀ ازبکستان و تاجیکستان اخیراً با وزیر خارجۀ امریکا در واشنگتن نگرانی شان را از وقایع اخیر شمال در میان گذاشته و خواستار همکاری واشنگتن شدند.

در این حال، وزیر دفاع ترکیه از تاجیکستان دیدن کرده و با مقامات امنیتی تاجیسکتان دربارۀ امنیت مرزی و پیش روی طالبان در شمال گفت وگو کرده‌اند.

اما روسیه می‌گوید که نگران پیش روی طالبان در شمال نیست. اما از اینکه داعش درحال سربازگیری می‌باشد، نگران است.

برخی کارشناسان از پیش روی طالبان در شمال ابراز تعجب کرده و گفته‌اند که ادامۀ بحران امنیتی در شمال، امنیت کشورهای آسیای مرکزی را با تهدید و خطر روبرو می‌سازد.

 

آسیای مرکزی,ازبکستان,اشرف غنی,امام علی رحمنن,تاجیسکتان,شمال افغانستان