جمعه, ۱۰ حمل ۱۴۰۳

در راستای همگرایی منطقه‌ای

عبدالله و رحمن

رییس‌جمهور تاجیکستان: از افراط‌گرایی و دهشت‌افگنی متضرر شده‌ایم

22 December 2020

امام علی رحمان رییس جمهور تاجیکستان امروز (سه‌شنبه، ۲ جدی ۱۳۹۹) در دیدار با عبدالله عبدالله رییس شورای عالی مصالحه‌ ملی در شهر دوشنبه گفت که کشورش در کنار افغانستان از هراس‌افگنی و دهشت افگنی متأثر شده است.  

به گزارش خبرگزاری کشور، رییس جمهور تاجیکستان، افغانستان را از دوستان و متحدان نزدیک تاجیکستان خواند و تأکید نمود که این روابط ریشه در همسایگی، مشترکات تاریخی، فرهنگی و دینی دارد. امام علی رحمان با اعلام حمایت همه جانبۀ جمهوری تاجیکستان از تلاش‌های صلح در افغانستان، صلح و ثبات در افغانستان را صلح و ثبات در تاجیکستان، منطقه و فراتر از منطقه خواند.

رییس جمهور تاجیکستان افزود که افغانستان، تاجیکستان و منطقه از دهشت‌افگنی، افراط‌گرایی و بی‌ثباتی متضرر شده‌اند و صلح و ثبات در افغانستان زمینۀ گسترش و توسعۀ تجارت و ترانزیت میان دو کشور، منطقه و اتصال آسیای مرکزی به جنوب آسیا را فراهم می‌سازد.

رییس جمهور تاجیکستان در بخش دیگر از صحبت‌های خود گفت که تاجیکستان دوست و متحد افغانستان است و از تلاش‌های صلح در افغانستان و تصمیم دولت و مردم این کشور در این عرصه حمایت می‌کند.

رییس شورای عالی مصالحه‌ ملی گفت که روابط و دوستی میان دو کشور بر ارزش‌ها و مشترکات تاریخی، فرهنگی و دینی دیرینه استوار است و از حمایت و همکاری‌های شما از داعیه‌ برحق مردم افغانستان در دوره‌های مختلف سپاس‌گزاریم.

رییس شورای عالی مصالحه‌ی ملی تأکید کرد که افغانستان می‌تواند از تجربۀ صلح و آشتی ملی در تاجیکستان استفاده نماید.

عبدالله عبدالله پس از دیدار با رییس جمور تاجیکستان در صحبت با با رسانه‌ها گفت که نزدیک به دو و نیم ساعت با امام علی رحمان رییس جمهور تاجیکستان ملاقات مفصل و همه‌جانبه داشتیم که در این ملاقات در رابطه به تمام موضوعات مرتبط به دو کشور به ویژه در باره‌ی روند صلح، همکاری‌های دوجانبه میان افغانستان و تاجیکستان بحث و تبادل نظر کردیم.

عبدالله عبدالله بیان داشت که در دیدار با دیگر مقام‌های جمهوری تاجیکستان نیز روی روابط دوجانبه، روند صلح و حمایت تاجیکستان از صلح افغانستان ملاقات‌های مفید و سازنده داشتیم.

رییس شورای عالی مصالحه‌ ملی گفت: جمهوری تاجیکستان همیشه حامی پروسه صلح در افغانستان بوده و در این راستا تجربۀ موفق دارد. از رییس جمهور تاجیکستان تقاضا کردم که تجربۀ خود شان را با ما شریک سازند، امروز تاجیکستان در صلح به سر می‌برد و به ترقی دست یافته است. نکته نظرات نیک و سازنده‌ی را به بحث گرفتیم.

عبدالله عبدالله افزود: رییس جمهور تاجیکستان به این عقیده است که صلح و آرامی در افغانستان به معنای صلح، آرامش و توسعه در کل منطقه است. در این راستا وعده سپردند که در عرصه‌های که تاجیکستان بتواند در تبادل نظر با سایر کشورها، کشورهایی که بر صلح افغانستان تأثیرگذار استند، همکاری جدی می‌کند. به عنوان یک شهروند و رییس شورای عالی مصالحه‌ی ملی افغانستان، از تعهد، تداوم همکاری، حسن نظر و حمایت همه‌جانبه کشور دوست و برادر (تاجیکستان) قدردانی می‌کنم.

 

 

افغانستان,امام علی رحمن,تاجیکستان,صلح,عبدالله عبدالله