امامعلی رحمان رییس جمهور تاجیکستان در یک سفر دو روزه از پاکستان دیدار کرد و با نخست وزیر، رییس جمهور و دیگر مقامات ارشد پاکستانی دیدار نمود.

به گزارش خبرگزاری کشور، وزارت امور خارجه پاکستان امروز با صدور بیانیه‌یی اعلام کرد: در جریان سفر امامعلی رحمان دو کشور چند توافقنامه همکاری امضا کرده که‌ هدف آن تعمیق همکاری‌های دوجانبه در حوزه‌های اقتصادی، سیاسی، دفاعی و امنیتی است.

تاجیکستان رئیس فعلی سازمان همکاری شانگهای است. اسلام‌آباد و دوشنبه درباره موضوعات مهم منطقه‌ای و بین‌المللی دیدگاه مشترک و در مجامع مختلف چندجانبه‌ از همکاری نزدیکی برخوردار هستند.

وزیر امور خارجه پاکستان ثور ماه امسال سفر رسمی دوجانبه به تاجیکستان انجام داد و همزمان در کنفرانس بین المللی قلب آسیا در شهر دوشنبه نیز شرکت کرد.

وزارت امور خارجه پاکستان تاکید کرد که سفر رئیس جمهوری تاجیکستان تلاش‌های دو کشور را برای ایجاد روابط طولانی مدت و چندبعدی تقویت می‌کند.

این هفتمین سفر رحمان به پاکستان از سال ۱۹۹۴ محسوب می‌شود. رئیس جمهوری تاجیکستان آخرین بار برای سفر رسمی دوجانبه سال ۲۰۱۵ از پاکستان بازدید کرد و پس از آن برای حضور در سیزدهمین اجلاس سران سازمان اکو در ماه مارچ ۲۰۱۷ به اسلام‌آباد سفر کرد.

سفر رحمن به تاجیکستان در حول مسایل افغانستان انجام شده است.

افغانستان پس از خروج نیروهای بین‌المللی آبستن تحولاتی است که آسیای مرکزی از پیامدهای آن در امان نخواهد ماند.  

اکنون بیش از هر زمانی مرزهای تاجیکستان ناامن است. طالبان تقریباً بخش اعظم مناطق مرزی با آسیای مرکزی از جمله تاجیکستان را زیر کنترل دارند. منابع محلی می‌گویند که تحت قلمرو طالبان، تروریستان مربوط آسیای مرکزی از جمله تحریک اسلامی ازبکستان، تاجیکستان، ترکمنستان، قزاقستان و چیچین در شمال فعالیت دارند. این گروه‌ها منتظر فرصت هستند که آتش را در کشورهای‌شان شعله ور سازند. تاجیکستان به خوبی آگاه است که خروج نیروهای خارجی خلای جبران‌ناپذیری را در قلمرو افغانستان به وجود خواهد آورد.

بدون شک دوشنبه این نگرانی را با اسلام‌آباد در میان گذاشته است. پاکستان در یک دهۀ اخیر به گونۀ سازمان‌دهی شده پایگاه‌های هراس‌افگنان را از مناطق قبایلی خارج کرده و در قلمرو افغانستان جابجا ساخته است. بخش کلان شبکه‌های جرمی و تروریستی در شمال افغانستان مستقر شده‌اند.