ملی پوشان فوتبال افغانستان، امروز(جمعه) در یک دیدار دوستانه در دوشنبه به مصاف تیم ملی تاجیکستان می روند.

در این دیدار، حسن امین، مدافع خلاق فوتبال این کشور که در بوندسلیگا سه آلمان توپ می‌زند، به علت مصدومیت و اویس عزیز به علت قرارداد با باشگاه جدید، تیم ملی را همراهی نمی‌کنند.

دیوید نجم و آدم نجم، دو بازیکن دیگر تیم ملی افغانستان که در لیگ امریکا شاغل هستند، در تاجیکستان به تیم ملی ملحق شدند.

این بازی، ساعت ۱۸:۳۰ به وقت افغانستان در ورزشگاه پامیر شهر دوشنبه برگزار می شود.

احمدفهیم کوهدامنی، از مقامات سفارت افغانستان در دوشنبه به خبرگزاری کشور گفت که به خاطر حمایت و تشویق تیم ملی افغانستان، 5000 هزار تکت خریداری کرده‌اند. او گفت که انتظار می‌رود شمار زیادی از افغان‌ها برای دیدن بازی به ورزشگاه پامیر حضور یابند.

او افزود که این تکت‌ها را به همکاری شماری از بازرگانان تهیه کرده‌اند.